Samtök rafverktaka (SART) hafa látið útbúa vandaðar skýringarteikningar og leiðbeiningar um úttektarmælingar löggiltra rafverktaka. Efnið er ætlað að styðja rafverktaka við framkvæmd mælinga og stuðla að faglegum og samræmdum vinnubrögðum.

Leiðbeiningarnar voru unnar í góðu samstarfi við sérfræðinga Húsnæðis- og mannvirkjastofnunar (HMS).

Samstarf við birgja mælitækja

Samhliða vinnunni bauð SART helstu birgjum rafverktaka að taka þátt í verkefninu með því að leggja til skýringarmyndir og leiðbeiningatexta um notkun þeirra mælitækja sem þeir hafa á boðstólum.

Ískraft og Reykjafell tóku þátt í verkefninu og lögðu til upplýsingar um notkun Fluke- og Kyoritsu-mæla. Með því er leitast við að auðvelda rafverktökum að tengja almennar leiðbeiningar um úttektarmælingar við þau tæki sem þeir nota við dagleg störf.

Efnið aðgengilegt rafverktökum

Leiðbeiningar um notkun mælitækjanna eru aðgengilegar hjá Ískrafti og Reykjafelli. Skýringarteikningar SART um úttektarmælingarnar eru jafnframt aðgengilegar félagsmönnum á innri vef SART.

Með verkefninu vill SART efla þekkingu á úttektarmælingum og styðja löggilta rafverktaka við að sinna mikilvægu hlutverki sínu af fagmennsku. Verkefnið er jafnframt dæmi um samstarf atvinnugreinarinnar, stjórnvalda og birgja um að miðla hagnýtum upplýsingum og stuðla að gæðum og öryggi í rafiðnaði.

Á myndinni eru Þoovaldur Guðmundsson Verkefnastjóri hjá Reykjafelli og Brynjar Stefánsson framkvæmdastjóri Ískrafts með Kristjáni Daníel Sigurbergssyni framkvæmdastjóra Sart

Fjölbreytt starfsemi og rík áhersla á fræðslu hjá Securitas

Kristján Daníel Sigurbergsson, framkvæmdastjóri SART, heimsótti á dögunum Securitas, sem er eitt af aðildarfyrirtækjum SART og Samtaka iðnaðarins.

Jóhann Gunnar Jóhannsson forstjóri, Guðrún Inga Guðlaugsdóttir, framkvæmdastjóri mannauðs og menningar, og Theodór Carl Steinþórsson, framkvæmdastjóri tækni og þróunar tóku á móti Kristjáni og kynntu starfsemi fyrirtækisins.

Starfsemi Securitas spannar vítt svið, allt frá öryggisvörslu og verðmætaflutningum til tæknilegra verkefna, meðal annars uppsetningar orkumæla fyrir Veitur á höfuðborgarsvæðinu, uppsetningar brunakerfa og aðgangsstýringakerfa, myndavéla og annarra hátæknilausna.

Hjá Securitas starfa rúmlega 550 manns og þar af er stór hópur fagmenntaðs starfsfólks. Um 68% starfsfólks í tæknistörfum eru með sveinspróf í rafiðngreinum 9 eru meistarar auk 13nema. Þá eru einnig 9 starfsmenn með sveinspróf í pípulögnum og 1 pípulagningameistari hjá fyrirtækinu.

Fræðsla mikilvægur hluti starfseminnar

Mikil áhersla er lögð á fræðslu og símenntun starfsfólks hjá Securitas. Fyrirtækið rekur meðal annars eigin fræðsluvef þar sem starfsfólki standa til boða og  starfsfólk í tækni getur tekið yfir 60 námskeið.

Fræðslan er liður í því að skapa starfsfólki tækifæri til að vaxa í starfi, efla þekkingu sína og færni og takast á við fjölbreyttari og flóknari verkefni. Með því er jafnframt byggð upp og viðhaldið mikilvæg fagþekking innan fyrirtækisins.

Þjálfunaraðstaða fyrir starfsfólk og nema

Óskar Ólafsson, löggiltur rafverktaki hjá Securitas, kynnti í heimsókninni sérstaka kennslu- og þjálfunaraðstöðu sem fyrirtækið hefur komið sér upp. Þar getur starfsfólk fengið verklega þjálfun í uppsetningu, notkun og viðhaldi þeirra kerfa og tæknilausna sem Securitas býður viðskiptavinum sínum.

Einnig var skoðuð aðstaða þar sem nemar í rafiðngreinum geta æft verklega þætti og undirbúið sig fyrir sveinspróf.

Á myndinni eru f.v. Guðrún Inga Guðlaugsdóttir, Kristján Daníel Sigurbergsson, Óskar Ólafsson og Jóhann Gunnar Jóhannsson

Félög byggingarmanna og rafverktaka á Suðurlandi og Suðurnesjum fagna ákvörðunum Sveitarfélagsins Árborgar og Reykjanesbæjar um að lækka eða fella niður byggingarréttargjöld. Félögin segja breytingarnar mikilvægt skref til að draga úr byggingarkostnaði, greiða fyrir íbúða- og atvinnuuppbyggingu og bæta rekstrarumhverfi fyrirtækja í mannvirkjagerð.

Meistarafélag Suðurlands og Félag rafverktaka á Suðurlandi hafa sent frá sér ályktun þar sem ákvörðun Árborgar um að lækka byggingarréttargjöld af íbúðarlóðum um 30–40%, eftir byggðakjörnum, er fagnað. Jafnframt verða byggingarréttargjöld af atvinnulóðum felld niður.

Meistarafélag byggingamanna á Suðurnesjum og Rafverktakafélag Suðurnesja hafa sömuleiðis ályktað um ákvörðun meirihluta Reykjanesbæjar um að fella byggingarréttargjöld niður í öllum flokkum. Gjöld vegna íbúðabyggðar, iðnaðarbyggðar, verslunar og þjónustu og athafnasvæða verða samkvæmt ákvörðuninni 0 kr./m².

Minni álögur greiði fyrir uppbyggingu

Í ályktununum kemur fram að mikil þörf sé á nýju húsnæði og mikilvægt sé að sveitarfélög leiti leiða til að draga úr kostnaði og hindrunum við uppbyggingu. Há gjöld við upphaf framkvæmda geti aukið fjármögnunar- og byggingarkostnað og þannig haft áhrif á endanlegt verð íbúðar- og atvinnuhúsnæðis.

Félögin á Suðurlandi segja ákvörðun Árborgar geta skapað aukið svigrúm til framkvæmda, fjárfestinga og atvinnusköpunar. Sérstaklega sé jákvætt að gjöld af atvinnulóðum verði felld niður, enda geti það aukið hvata fyrirtækja til fjárfestinga og atvinnuuppbyggingar í sveitarfélaginu.

Félögin á Suðurnesjum benda jafnframt á að niðurfelling gjalda í Reykjanesbæ geti skipt miklu fyrir minni byggingaraðila og iðnaðarmenn sem ráðast í eigin verkefni, auk fjölskyldna sem hyggjast byggja sér heimili. Minni kostnaður við upphaf framkvæmda geti lækkað aðgangshindranir og stuðlað að aukinni samkeppni.

Gjaldtaka vaxið hraðar en kostnaður

Í ályktun félaganna á Suðurnesjum er bent á að gjaldtaka sveitarfélaga vegna byggingarréttar og gatnagerðar hafi aukist mikið undanfarin ár og vaxið langt umfram almenna kostnaðarþróun í greininni.

Þar kemur einnig fram að hagnaðarhlutfall fyrirtækja í húsnæðisuppbyggingu hafi lækkað úr 10,5% árið 2022 í 6,2% árið 2024. Það sé undir 7,3% meðaltali viðskiptahagkerfisins í heild.

Félögin telja mikilvægt að gjaldtaka sveitarfélaga vegna uppbyggingar sé hófleg, gagnsæ og fyrirsjáanleg. Ákvarðanir Árborgar og Reykjanesbæjar séu því jákvæð dæmi um hvernig sveitarfélög geti með breytingum á gjaldtöku bætt skilyrði til uppbyggingar.

Meistarafélag byggingamanna á Suðurnesjum og Rafverktakafélag Suðurnesja hvetja jafnframt Reykjanesbæ til að fylgja breytingunum eftir, meðal annars með fyrirhugaðri niðurfellingu samþykktar um innviðagjald, nægu lóðaframboði og skýru skipulagi.

Skora á stjórnvöld að auka ekki byggingarkostnað

Í báðum ályktunum er einnig beint ákalli til stjórnvalda um að aðgerðir ríkis og sveitarfélaga vinni í sömu átt og styðji við framkvæmdir, viðhald og uppbyggingu.

Félögin leggjast gegn því að endurgreiðsla virðisaukaskatts vegna vinnu iðnaðarmanna á byggingarstað verði lækkuð eða felld niður. Félögin vara sérstaklega við mögulegri lækkun endurgreiðslunnar úr 35% í 0% og telja að slík breyting myndi auka byggingarkostnað og vinna gegn áhrifum þeirra aðgerða sem sveitarfélögin hafa nú gripið til.

Félögin hvetja önnur sveitarfélög til að skoða hvernig draga megi úr álögum og hindrunum við uppbyggingu. Fyrirsjáanlegt og samkeppnishæft rekstrarumhverfi byggingar- og mannvirkjageirans sé mikilvægt til að tryggja áframhaldandi íbúða- og atvinnuuppbyggingu og skapa fyrirtækjum, iðnaðarmönnum og heimilum betri skilyrði til framkvæmda.

Kjartan Gíslason afhenti á dögunum Pétri H. Halldórssyni bók til varðveislu sem tengist sögu Samtaka rafverktaka og forvera þeirra. Bókin hafði áður verið í eigu föður Kjartans, Gísla Jóhanns Sigurðssonar, sem gegndi um árabil mikilvægu hlutverki í félagsstarfi rafverktaka.

Við afhendinguna voru teknar myndir til að varðveita minningu um gjöfina og tengsl hennar við sögu samtakanna.

Formaður LÍR/SART í nær áratug

Gísli Jóhann starfaði ötullega að félagsmálum rafverktaka og var formaður LÍR/SART á árunum 1955–1964. Hann tók þannig virkan þátt í starfi og uppbyggingu samtaka rafverktaka á mótunarárum þeirra.

Á sextugsafmæli Gísla Jóhanns færðu félögin honum veglega bók að gjöf og þökkuðu honum um leið vel unnin störf í þágu samtakanna.

Bókin hefur að geyma teikningar úr Íslandsferðum franska náttúrufræðingsins og landkönnuðarins Paul Gaimard árin 1835 og 1836. Hún er bæði stór og vegleg og hefur verið varðveitt innan fjölskyldu Gísla um áratugaskeið.

Eftir andlát móður Kjartans árið 2015 komst bókin í hans vörslu. Þegar kom að því að finna henni nýjan stað leitaði Kjartan til Samtaka rafverktaka og bauð þeim bókina til varðveislu.

Hluti af sögu félagsstarfs rafverktaka

Með afhendingunni hefur bókin nú aftur tengst þeim samtökum sem upphaflega færðu Gísla Jóhanni hana að gjöf. Hún er jafnframt áþreifanleg áminning um þá einstaklinga sem lögðu sitt af mörkum til félagsstarfs rafverktaka og uppbyggingar samtaka þeirra.

Varðveisla muna og heimilda af þessu tagi stuðlar að því að halda sögu atvinnugreinarinnar og samtaka hennar á lofti og varðveita hana fyrir komandi kynslóðir.

Kristján Daníel Sigurbergsson, framkvæmdastjóri Sart heimsótti nýverið fyrirtækið Raflýsingu ehf., sem rekur verkstæði og skrifstofu í Turnahvarfi í Kópavogi. Raflýsing er aðili að Samtökum iðnaðarins og Sart í gegnum Félag löggiltra rafverktaka.

Fjölskyldufyrirtæki með áratuga reynslu

Raflýsing er rekin af feðgunum Sigtryggi Stefánssyni og Rúnari Sigtryggssyni og sinnir almennri raflagnavinnu fyrir fjölbreyttan hóp viðskiptavina, þar á meðal ríki, sveitarfélög, fyrirtæki og einstaklinga. Hjá fyrirtækinu starfa tíu manns.

Sigtryggur hóf rekstur á eigin kennitölu árið 1984 en árið 1995 gekk Rúnar til liðs við reksturinn. Þá var Raflýsing ehf. stofnuð og hefur fyrirtækið síðan byggt upp öfluga þjónustu og víðtæka reynslu á sviði rafverktöku.

Áhyggjur af þjónustu veitufyrirtækja

Í heimsókninni ræddu feðgarnir meðal annars þær breytingar sem orðið hafa í starfsumhverfi rafverktaka á undanförnum árum. Þeir sögðu þjónustu veitufyrirtækja við löggilta rafverktaka hafa versnað og nefndu að oft væri erfitt að fá svör við fyrirspurnum eða skýringar á töfum.

Að þeirra mati geta slíkar tafir haft í för með sér umtalsverðan kostnað fyrir verktaka og viðskiptavini, án þess að skýrar ástæður liggi fyrir.

Bjartsýni þrátt fyrir áskoranir

Þrátt fyrir þessar áskoranir horfa Sigtryggur og Rúnar bjartsýnir til framtíðar. Þeir segjast hlakka til að takast áfram á við fjölbreytt verkefni fyrir viðskiptavini sína og byggja á þeirri reynslu og þekkingu sem fyrirtækið hefur aflað sér á rúmum fjórum áratugum.

Heimsóknin var jafnframt gott tækifæri til að ræða starfsumhverfi rafverktaka og þau verkefni sem skipta aðildarfyrirtæki Samtaka iðnaðarins máli. Slíkt samtal er mikilvægt til að samtökin geti áfram unnið að því að bæta rekstrarskilyrði fyrirtækja og koma sjónarmiðum þeirra á framfæri.