Íbúðauppbygging hefur víðtæk áhrif á atvinnulíf og verðmætasköpun

Ný íbúðahverfi eru mun meira en hús og götur. Að baki hverju uppbyggingarverkefni stendur umfangsmikið samstarf fjölmargra sérfræðinga, fyrirtækja og iðngreina sem vinna saman að því að skapa samfélagslega innviði til framtíðar. Samkvæmt nýrri umfjöllun Kristjáns Daníels Sigurbergssonar, framkvæmdastjóra Samtaka rafverktaka, getur uppbygging stærri íbúðahverfa kallað á þátttöku allt að 250 starfsgreina frá fyrstu hugmynd að daglegum rekstri hverfis. 

Rafverktakar gegna lykilhlutverki í uppbyggingunni

Þegar skipulags- og hönnunarvinna er lokið taka framkvæmdir við. Þá koma fjölmargir iðnaðarmenn að verkefnunum, þar á meðal rafverktakar og rafvirkjar sem sjá um uppsetningu og tengingu rafkerfa, fjarskiptainnviða, öryggiskerfa og annarra tæknilausna sem nútíma hverfi byggja á. Kröfur um orkunýtni, stafræna innviði og snjalllausnir hafa aukið mikilvægi rafiðnaðarins í uppbyggingu nýrra hverfa á undanförnum árum.

Samdráttur í byggingariðnaði hefur víðtæk áhrif

Í greininni er bent á að áhrif samdráttar í byggingariðnaði nái langt út fyrir byggingarstaðina sjálfa. Þótt oft sé horft til áhrifa á húsasmiði, múrara og aðra iðnaðarmenn hafi minni uppbygging einnig áhrif á rafverktaka, aðfangakeðjur, flutningafyrirtæki, þjónustuaðila og fjölda annarra fyrirtækja sem tengjast mannvirkjagerð. Þá hefur atvinnulausum innan byggingariðnaðarins fjölgað á síðustu misserum og fyrirhugaðar breytingar á skattaumhverfi gætu dregið enn frekar úr uppbyggingu íbúðarhúsnæðis.

Atvinnusköpun heldur áfram eftir að framkvæmdum lýkur

Þótt byggingaframkvæmdum ljúki þegar íbúðir eru afhentar heldur atvinnusköpunin áfram. Rekstur og viðhald hverfa krefst áframhaldandi þjónustu, þar á meðal reksturs veitukerfa, öryggislausna og tæknikerfa sem rafverktakar koma oft að bæði við uppsetningu og viðhald. Auk þess skapast ný störf í skólum, verslun, heilbrigðisþjónustu og annarri nærþjónustu eftir því sem hverfin byggjast upp.

Mikilvægt að tryggja stöðugt rekstrarumhverfi

Samtök rafverktaka leggja áherslu á að öflug og stöðug uppbygging íbúðarhúsnæðis sé ekki aðeins forsenda fyrir því að mæta húsnæðisþörf landsmanna heldur einnig fyrir atvinnu, verðmætasköpun og framþróun í fjölmörgum greinum. Skilvirk stjórnsýsla, fyrirsjáanlegt rekstrarumhverfi og skýr uppbyggingarstefna eru lykilatriði til að tryggja áframhaldandi verkefni fyrir fyrirtæki í rafiðnaði og öðrum greinum sem tengjast mannvirkjagerð.

Taktu þátt með Rafmennt þann 10. júní og fagnaðu rafvirkjum – þeim faglærðu sérfræðingum sem halda samfélagslegum innviðum gangandi og styðja við seiglu Íslands og sjálfstæði í orkumálum!

Að þessu tilefni mun Rafmennt bjóða í opið hús milli 16.30 og 18.30. (1. hæð - gengið inn Grafarvogsmegin)

Á opnu húsi verða flutt tvö erindi um;
- Viðnámsþróttur á Þjórsársvæði, Magni Þ. Pálsson frá Landsnet
- Rafvirki framtíðarinnar, Stefán Pálsson mun lýsa fyrir okkur hans sýn
- Skemmtiatriði, Freyr Eyjólfsson

Grillvagninn verður fyrir utan að erindum loknum með hamborgara.

Framtíðin er rafmögnuð! ⚡

Athugið að skráning er nauðsynleg hér!

Félag löggiltra rafverktaka bíður félagsmönnum til Sumargleði að Bæjarflöt 4, 112 Reykjavík, fimmtudaginn 21. maí frá kl 17-?

Þeir Stefán Einar Stefánsson og Stefán Pálsson sem eru þjóðkunnir áhugamenn vín og bjór munu leiða félagsmenn í allan sannleikann um þessar guðaveigar.

Meðal annars verður boðið uppá:

• Bjór og vínsmökkun
• Grillaðar pylsur frá Pylsumeistaranum ásamt meðlæti.
• Pílu keppni
• Góðan félagsskap og gleði.

 Skráning er nauðsynleg og fer fram hér:  Sumargleði Félags löggiltra rafverktaka - FLR – Fill in form

 Félagsmönnum gefst einnig kostur á að taka með sér gesti sem hafa áhuga á að kynna sér aðild að FLR, í þeim tilfellum þarf að skrá gestina fyrir fram.

Jóhanna Klara Stefánsdóttir sviðsstjóri mannvirkjasviðs SI var í Bítinu á Bylgjunni núna í morgun og ræddi meðal annars um boðaða lækkun stjórnvalda á endurgreiðslu virðisaukaskatts vegna vinnu manna á verkstað sem gæti jafngilt að meðaltali 2,5-3 milljóna króna skattahækkun á byggingarkostnað 100 fermetra íbúðar. 

Hlekkur á viðtalið er hér:  https://www.visir.is/k/16fa9b6e-e53f-488a-adf9-1fb3200a1e32-1776844383796

Hér er hlekkur á greiningu SI þar sem fram kemur að fyrirhuguð hækkun skatta mun draga verulega úr íbúðauppbyggingu

https://www.si.is/media/_eplica-uppsetning/Greining-SI_Fyrirhugud-haekkun-skatta-mun-draga-verulega-ur-ibudauppbyggingu-16-04-2026.pdf

Bilanagreinar efla verklega kennslu í rafiðngreinum á Ísafirði

Menntaskólinn á Ísafirði hefur fengið tvo bilanagreina að gjöf frá Félagi rafverktaka á Vestfjörðum (FRVF), með stuðningi Samtaka rafverktaka (SART) og fjölmargra fyrirtækja á svæðinu. Gjöfin, sem metin er á um 2 milljónir króna, er mikilvæg viðbót við aðstöðu til kennslu í rafiðngreinum og mun styrkja verklega færni nemenda og undirbúning þeirra fyrir atvinnulífið.

Samstarf atvinnulífs og skóla lykilatriði

Að gjöfinni standa fyrirtæki úr raforku- og tæknigeiranum á Vestfjörðum, þar á meðal Póllinn, Rafskaut, Rafverk AG, Eyfaraf, ÓK raf, Kalli Raf og Grundarorka, auk SART, Smith & Norland, Orkubús Vestfjarða, Verkís, Íslenska kalkþörungafélagsins og Ístækni. Verkefnið er skýrt dæmi um árangursríkt samstarf atvinnulífs og menntakerfis.

Sævar Óskarsson, formaður FRVF, rakti aðdraganda gjafarinnar og lagði áherslu á að búnaðurinn hefði verið valinn með þarfir nemenda í huga. Markmiðið væri að efla nám í rafiðngreinum og styðja við þá sem kjósa iðnnám. Hann benti jafnframt á að eftirspurn eftir rafvirkjum væri mikil og að vel menntaðir fagmenn væru eftirsóttir á vinnumarkaði.

Fjárfesting í færni og framtíð

Pétur H. Halldórsson, formaður SART, undirstrikaði að gjöfin væri ekki einungis tæknibúnaður heldur fjárfesting í framtíðinni. Með aðgengi að nútímalegum búnaði fá nemendur dýrmæta innsýn í fagið og betri undirbúning fyrir raunveruleg verkefni. Hann lagði jafnframt áherslu á mikilvægi þess að efla samstarf atvinnulífs og skóla, sérstaklega á landsbyggðinni.

Heiðrún Tryggvadóttir, skólameistari Menntaskólans á Ísafirði, þakkaði fyrir gjöfina og sagði hana skipta miklu máli fyrir starfsemi skólans og nemendur hans. Þá benti Elfar Ari Stefánsson, kennari í rafiðngreinum, á að stuðningur fyrirtækja hefði bein áhrif á áhuga nemenda og tengsl þeirra við atvinnulífið.

Styður við uppbyggingu iðnmenntunar

Eftirspurn eftir rafvirkjum hefur aukist verulega á undanförnum árum og ljóst að þörf er á öflugri uppbyggingu iðnmenntunar. Gjöfin til Menntaskólans á Ísafirði er mikilvægt framlag í þá átt og sýnir hvernig fyrirtæki geta lagt sitt af mörkum til að efla menntun og tryggja aðgengi að hæfu starfsfólki.

Framtak sem þetta endurspeglar mikilvægt hlutverk Samtaka rafverktaka og aðildarfélaga þeirra við að bæta rekstrarumhverfi rafiðnaðarins, styðja við menntun og efla tengsl milli skóla og atvinnulífs. Með markvissu samstarfi er lagður grunnur að sterkari rafiðnaði og aukinni verðmætasköpun um land allt.

Frá vinstri.  Vignir Örn Pálsson Grundarorku, Magnús Valsson Rafskaut, Elías Jónatansson Orkubú Vestfjarða, Sævar Óskarsson form FRVF / Póllinn, Albert Guðmundsson Rafverk AG, Einar Yngvason Rafskaut, Jóhann Bæring Gunnarsson Ístækni og Pétur Hákon Halldórsson form SART

Frá vinstri. Sævar Óskarsson form FRVF / Póllinn, Heiðrún Tryggvadóttir Skólameistari, Elvar Ari Stefánsson Kennari Rafiðngreina, Pétur Hákon Halldórsson form SART

Konur í rafiðnaði í brennidepli á ráðstefnu SART

Ráðstefnan Konur í rafiðnaði, sem haldin var á vegum SART, varpaði ljósi á stöðu og tækifæri kvenna innan greinarinnar. Nú hafa verið birt fjögur stutt myndbönd frá ráðstefnunni sem draga fram lykilþætti umræðunnar, auk heildarupptöku af dagskránni.

Áhersla á sýnileika og fyrirmyndir

Í tveimur myndböndum er sérstök áhersla lögð á mikilvægi sýnileika kvenna í rafiðnaði og gildi þess að hafa sterkar fyrirmyndir. Fram kemur að aukinn sýnileiki getur haft bein áhrif á áhuga ungra kvenna á greininni og stuðlað að fjölbreyttari nýliðun.

Viðmælendur benda á að fyrirmyndir gegni lykilhlutverki við að brjóta niður staðalmyndir og sýna fram á fjölbreytta möguleika innan rafiðnaðarins.

Fjölbreytni skapar verðmæti

Þriðja myndbandið fjallar um fjölbreytni á vinnustöðum og þann ávinning sem hún skilar. Rætt er um að fjölbreytt teymi leiði til betri ákvarðanatöku, aukinnar nýsköpunar og sterkari samkeppnisstöðu fyrirtækja.

Áhersla er lögð á að fyrirtæki þurfi markvisst að vinna að því að skapa umhverfi þar sem fjölbreytni fær að njóta sín.

Vinnustaðamenning lykilatriði

Í fjórða myndbandinu er kastljósinu beint að vinnustaðamenningu. Þar er fjallað um mikilvægi þess að skapa jákvætt og styðjandi starfsumhverfi þar sem allir starfsmenn fá tækifæri til að þróast og leggja sitt af mörkum.

Bent er á að góð vinnustaðamenning sé forsenda þess að laða að og halda í hæft starfsfólk, óháð kyni.

Heildarmynd ráðstefnunnar aðgengileg

Auk styttri myndbanda hefur verið birt upptaka af allri dagskrá ráðstefnunnar, sem veitir heildstæða innsýn í erindi, umræður og áherslur dagsins.

Mikilvægt fyrir framtíð iðnaðarins

Umfjöllun ráðstefnunnar endurspeglar mikilvægi þess að efla fjölbreytni og jöfn tækifæri innan iðnaðarins. Fyrir Samtök iðnaðarins er ljóst að bæta þarf rekstrarumhverfi þannig að fyrirtæki geti nýtt mannauð sinn til fulls og mætt áskorunum framtíðarinnar.

Með því að styðja við aukinn sýnileika, jákvæða vinnustaðamenningu og fjölbreytni í rafiðnaði er lagður grunnur að sterkari og samkeppnishæfari íslenskum iðnaði.

https://vimeo.com/1181330333

https://vimeo.com/1181330277

https://vimeo.com/1181330381

https://vimeo.com/1181331723

Upptaka frá rástefnunni:

https://vimeo.com/1177710750