Beint ß lei­arkerfi vefsins
Sart.is

FrÚttir

5.6.2013

StŠkkun og efling stafrŠnna sjˇnvarpsdreifikerfa um loftnet

═ kjölfar nýs samnings milli Vodafone og Ríkisútvarpsins um stafræna sjónvarpsdreifingu og rekstur dreifikerfa RÚV hefur Vodafone hafið undirbúning að mikilli stækkun á dreifikerfum sínum. Samningurinn felur í sér að tvær sjónvarpsrásir RÚV skuli ná til 99,8% heimila og fyrirtækja auk helstu sumarhúsasvæða fyrir árslok 2014. Fyrst í stað verður önnur rásin  í háskerpu (HD) en  innan fjögurra ára er stefnt að því að báðar rásir verði sendar út í háskerpu.

Vodafone rekur í dag um 90 stafræna sjónvarpssenda á um 70 sendistöðum landið um kring. Í árslok 2014 verða sendarnir hins vegar orðnir 300 talsins og sendistaðirnir 140. Tæknin sem notuð verður við útsendingarnar er blanda af DVB-T (Digital Video Broadcasting Terrestrial) sem er sá staðall sem núverandi dreifikerfi Vodafone byggir á (Digital Ísland) og nýrri kynslóð þeirrar tækni, DVB-T2. 

┴ öllum sendistöðum verða því a.m.k. núverandi aðal-flétta Digital Ísland sem í dag inniheldur 8 sjónvarpsstöðvar og ný DVB-T2 flétta sem mun innihalda háskerpurás RÚV og fleiri stöðvar. Með DVB-T2 tækninni  ber hver flétta (og þ.a.l. hver sendir) um 50% meira gagnamagn en hefðbundin DVB-T flétta gerir í dag. Þetta er mjög mikilvægt þar sem krafan um aðgang að háskerpuútsendingum sem og auknu framboði sjónvarpsefnis er rík um dreifðar byggðir Íslands.

Til viðbótar verður um DVB kerfin sendar út útvarpsdagskrár RÚV og textavarpið. Allar útsendingarnar verða á UHF sjónvarpsbandinu og til að ná þeim þarf stafrænan sjónvarps-móttakara og í einhverjum tilfellum þarf að endurnýja loftnet og/eða snúa þeim í átt að nýjum sendastað.

Flest sjónvarpstæki sem seld hafa verið hér á landi sl. 10 ár hafa innbyggðan stafrænan DVB-T móttakara og síðastliðin 2 ár a.m.k. hafa svo DVB-T2 móttakarar verið í flestum nýjum sjón-varpstækjum. Eigendur þeirra þurfa því engan aukabúnað til að taka við öllum útsendingum RÚV þegar nýja dreifikerfið verður komið í rekstur. 

Eigendur eldri sjónvarpstækja þurfa hins vegar að útvega sér stafrænan móttakara, sem þeir geta ýmist keypt hjá Vodafone eða í sjónvarpsverslunum eða leigt myndlykil með móttakara hjá Vodafone.  Dagskrá RÚV mun eftir sem áður verða ólæst og því verður ekki þörf á aðgangskorti nema til að ná þeim áskriftarstöðvum sem einnig eru sendar út á sama kerfi. 

Hliðræna sjónvarpsdreifikerfi Ríkisútvarpsins er orðið gamalt, byggir á úreltri tækni og bæði dýrt og tæknilega erfitt í rekstri. Það verður nú lagt niður í áföngum frá og með næsta hausti og er stefnt að lokun þess í árslok 2014.

Vodafone hefur einnig tekið að sér rekstur útvarpsdreifikerfa Ríkisútvarpsins næstu 15 árin og verða miklar endurnýjanir á FM sendum Rásar 1 og Rásar 2 víða um land á næstu mánuðum og árum. Rekstur langbylgjusendana á Gufuskálum og Eiðum er einnig hluti samningsins.

Vodafone mun áfram reka örbylgjudreifikerfi Digital Ísland á SV-horni landsins og sjónvarps-dreifing um xDSL og ljósleiðara er í stöðugri og góðri stækkun. Báðar sjónvarpsrásir RÚV verða einnig í boði eftir þeim dreifileiðum.

Vodafone er og hefur verið undanfarin ár í góðu sambandi við marga rafverktaka á lands-byggðinni. Margir rafverktakar hafa sinnt þjónustu við tæknibúnað félagsins, rekstri hýsinga eða sinnt þjónustu við sameiginlega viðskiptavini. Verkefnið sem nú fer í hönd mun skapa mörg ný tækifæri til að efla það samstarf og um leið bæta möguleika landsmanna allra á að nálgast sjónvarpsefni í bættum gæðum.

Frétt frá Vodafone


Samstarfsa­ilar

Smelltu ß mynd til a­ fara ß vef

Sa til hægri
mannvirkjastofnun
Mannvirkjastofnun
Rafiðnaðarskólinn
Fræðsluskrifstofa
Rafiðnarasambandið
Rafbók
┴kvæðisvinnustofaá
Stafir til hægri

Íryggi fagmennska

Slˇ­in ■Ýn:

FrÚttir

Toppmynd


Stjˇrnbor­

Minna letur StŠrra letur VeftrÚ