Fréttir

Neytendastofa vekur athygli á nýrri breytingu á reglugerð um raforkuvirki nr. 264/1971. Helstu breytingar eru þær að að kafli 2 Heiti og hugtök og kafli 3 Reglur um gerð, tilhögun og starfrækslu raforkuvirkja eru felldir niður. Þess í stað skulu háspennt raforkuvirki, háspenntar loftlínur, ásamt lágspenntum raforkuvirkjum (neysluveitum) og lágspenntum loftlínum uppfylla ákveðnar grunnkröfur sem tilgreindar eru í grein 1.10 í reglugerðinni, ásamt sérstökum öryggiskröfum sem tilgreindar eru í greinum 1.11, 1.12 og 1.13.

Starfsmenn sem hafa verið í fullu starfi allt árið hjá sama fyrirtæki og eru við störf í fyrirtækinu síðustu viku í nóvember eða í fyrstu viku desember skulu eigi síðar en 15. desember fá greidda sérstaka eingreiðslu, desemberuppbót.

Staðlaráði er heimilt að gefa út íslenska forstaðla. Forstaðall (FS) er skjal sem inniheldur reglur eða leiðbeiningar og er ætlað til notkunar á svipaðan hátt og staðall. Forstaðall hefur takmarkaðan gildistíma, að hámarki þrjú ár, og skal koma fram á forsíðu forstaðalsins hver gildistími hans er.

Í launakönnun sem gerð var hjá SART fyrirtækjum í október kom fram að meðal tímakaup (taxtakaup) rafvirkja í dagvinnu er 1.523,- kr. Er niðurstaðan nálægt því hin sama og kom fram í síðustu launakönnun RSÍ. Meðal tímakaup (taxtakaup) nema og ófaglærðra í dagvinnu var 1.152,- kr.

Rafstaðlaráð hefur samþykkt að unnið verði að upptöku forstaðals á grunni “Leiðbeinandi tæknireglna um boðskiptalagnir”. Markmiðið er að koma skipulagi á hönnun, lagningu, frágang og prófanir á boð-skiptakerfum fyrir húsbyggingar. Þessi ákvörðun er mikil viðurkenning á því starfi sem hópur áhugasamra aðila hefur verið að vinna að á síðustu tveim árum.  

Jóla-morgunverðarfundur FLR verður haldinn í Borgartúni 35, 6. hæð fimmtudaginn 13. desember nk. kl. 08:45 - 10:00. Að þessu sinni leggja menn tæknimálin til hliðar og snúa sér að mýkri málum. Þorgrímur þráinsson rithöfundur mætir á staðinn og les upp úr nýútkominni bók sinni " Hvernig gerirðu konuna þína hamingjusama".

Þann 1. janúar 2008 tekur gildi ný atvinnugreinaflokkun á Íslandi, ÍSAT2008. Flokkunin er byggð á nýrri atvinnugreinaflokkun Evrópusambandsins, NACE Rev. 2,  sem mun gilda í öllum ríkjum evrópska efnahagssvæðisins frá 1. janúar 2008. Frá þeim tíma verður nýju flokkuninni beitt í fyrirtækjaskrá ríkisskattstjóra og í opinberri hagskýrslugerð af Hagstofu Íslands.