Fréttir

Á aðalfundi SART sem haldinn var á Grand Hótel Reykjavík, föstudaginn 5. mars sl. var samþykkt að breyta nafni samtakanna í "Samtök rafverktaka".

Aðalfundur SART- Samtaka rafverktaka,  haldinn á Grand Hótel Reykjavík föstudaginn  5. mars 2010 ítrekar og mótmælir harðlega aðgerðarleysi stjórnvalda gagnvart heimilum og fyrirtækjum í landinu. Þá lýsir fundurinn vanþóknun sinni á framgöngu þeirra ráðherra og alþingismanna sem virðast hafa sett sér það eina markmið að setja fótinn fyrir fjárfestingar í virkjunum og stóriðju og hindra þannig framgang verklegra framkvæmda sem þjóðin kallar eftir. Aðalfundur SART skorar á þingmenn allra flokka að sameinast nú um heildarhagsmuni þjóðarinnar og láta verkin tala.

Staðalvísir, Raflagnir bygginga, Handbók um ÍST 200:2006 er komin út. Handbókin sem er samvinnuverkefni Rafstaðlaráðs og SART er uppflettirit sem ætlað er til þess að skýra helstu ákvæði ÍST 200 og auðvelda þannig notkun hans. Handbókinni er ætlað að vera hjálpartæki lesandans til að öðlast betri skilning á ákvæðum ÍST 200 svo að hann geti tekið sjálfstæðar og rökstuddar ákvarðanir t.d. við hönnun og endanlega gerð raflagnar.

Vinnueftirlit ríkisins hefur ákveðið að hefja vinnu við gerð áhættumats fyrir raflagnavinnu í samstarfi við SART. Áætlað er að vísir að gátlista geti legið fyrir í lok apríl. Tilgangur með gerð skriflegrar áætlunar um öryggi og heilbrigði  á vinnustað er að fyrirbyggja og draga úr slysum, óhöppum, álagi, vanlíðan og heilsutjóni sem starfsmenn geta orðið fyrir við störf sín hvort sem er líkamlegu eða andlegu. Áhættumat starfa er viðamesta aðgerðin í verkinu.

Björgvin Tómasson orgelsmiður hlaut viðurkenninguna heiðursiðnaðarmaður ársins 2009 á árlegri nýsveinahátíð Iðnaðarmannafélagsins í Reykjavík þann 6. febrúar sl. Markmið hátíðarinnar er að efla virðingu fyrir störfum iðnaðar- og handverksmanna. Björgvin er löngu þekktur af verkum sínum. Hann hefur smíðað orgel fyrir kirkjur og félög víða um land. Smíðum hans hafa menn gefið nafnið listasmíð sem hann hefur hlotið einróma lof fyrir.

Vísitala byggingarkostnaðar var birt á nýjum grunni þann 21. janúar síðastliðinn. Nýtt vísitöluhús liggur til grundvallar og fór vinna við magntöku þess fram í nánu samstarfi við reynda verktaka á byggingarmarkaði. Nýja vísitöluhúsið er 18 íbúða svalagangshús á höfuðborgarsvæðinu.

Brunamálastofnun hefur vakið athygli eigenda húsnæðis á fyrrum varnarsvæði á Keflavíkurflugvelli á því að bráðabirgða-lög þau sem sett voru og heimiluðu notkun raflagna og raffanga samkvæmt amerískum stöðlum á svæðinu, renna út þann 1. október n.k. Eftir það verða öll raftæki og raflagnir í byggingum að vera í samræmi við íslenskar reglur. HS veitur hafa á undanförnum misserum lagt nýtt rafdreifikerfi á svæðinu og er því ætlað að leysa af hólmi eldra dreifikerfi sem er samkvæmt amerískum reglum. Það stendur ekki til að reka  tvöfalt dreifikerfi á svæðinu eftir að lögin falla úr gildi. 

Samráðsfundur allra helstu hagsmunasamtaka atvinnulífs var haldinn þann 26. janúar s.l. en til fundarins var boðað af formönnum Viðskiptaráðs Íslands og Samtaka atvinnulífs.  Auk þeirra tóku þátt fulltrúar Bílgreinasambandsins, Félags íslenskra stórkaupmanna, Landssambands íslenskra útvegsmanna, Samorku, Samtaka ferðaþjónustu, Samtaka fjármálafyrirtækja, Samtaka fiskvinnslustöðva, Samtaka iðnaðar, Samtaka verslunar og þjónustu og Samtaka fyrirtækja í rafiðnaði.

Síðastliðin þrjú ár hefur rafmagnsöryggissvið Brunamálastofnunar látið skoða raflagnir á annað hundrað leikskóla víðsvegar um landið. Markmiðið með skoðununum var að fá sem gleggsta mynd af ástandi raflagna og rafbúnaðar í leikskólum og koma ábendingum á framfæri við eigendur og umráðamenn þeirra um það sem betur má fara.

Nú þegar það er slaki á vinnumarkaðinum er upplagt fyrir menn sem hafa unnið í rafiðngreinum í mörg ár en ekki klárað sitt nám að fá stöðu sína metna og bæta síðan við það sem eftir er til að fara í sveinspróf í sínu fagi.